Суық тию, тұмау немесе синусит: қалай ажыратуға болады?

Вирустық инфекция: белгілер қайдан пайда болады?

Күз-қыс мезгіліндегі инфекцияларды жақсырақ түсіну үшін ең алдымен, — белгілердің пайда болу табиғатына тоқталған жөн. Белгілердің басым бөлігі вирустардың әсерінен дамиды. Ауада болатын вирустық бөлшектер (мысалы, басқа адамның түшкіруі немесе жөтелі кезінде пайда болатын аэрозоль арқылы) ағзаға шырышты қабықтар арқылы, негізінен тыныс жолдары арқылы енеді. Шырыштың қорғаныш тосқауылынан өткен соң, вирустар жасушаларға еніп, көбейе бастайды да, ағзаның қорғаныш механизмдерін іске қосады.

Вирустың енуі нәтижесінде қабыну реакциясы дамиды, оның негізгі мақсаты — қоздырғышпен күресу. Аурудың барлық белгілері дәл осы қабынумен байланысты. Қабыну экссудациямен, ісінумен, қызарумен және ауырсынумен қатар жүреді. Соның салдарынан науқаста мұрыннан су ағу, бас ауруы, қабыну секретін шығаруға көмектесетін жөтел сияқты белгілер пайда болады.

Егер инфекция мұрынның шырышты қабатында шоғырланса, мұрыннан су ағу мен мұрын бітелуі байқалады. Ал вирус жұтқыншақ жасушаларын зақымдаса, фарингит дамиды. Көбінесе бұл белгілер бір-бірімен қатар кездесіп, араласып жатады.

Инфекция түрін қалай анықтауға болады?

Жоғарыда айтылғандай, тыныс жолдарының көптеген инфекциялары бірдей қоздырғыш әсерінен дамып, ұқсас белгілермен және ағыммен өтеді. Алайда ең жиі кездесетін үш жағдай — суық тию, синусит және тұмау — өзіне тән ерекшеліктерімен ажыратылады, дәл осы белгілер арқылы біз нақты қай аурумен бетпе-бет келгенімізді анықтай аламыз.

Суық тию

Әдетте бұл жеңіл әрі өздігінен жазылатын тыныс жолдарын жалпы қамтитын белгілермен өтетін жағдай. Мұрыннан су ағу, жөтел, тамақтың ауыруы, жалпы әлсіздік және кейде дене қызуының сәл көтерілуі байқалуы мүмкін.
Ауру біртіндеп, баяу дамиды, ал белгілер күнделікті өмірге айтарлықтай кедергі келтірмейді, дегенмен, бұл демалыс пен қалпына келуді елемеуге себеп емес.

Грипп (инфлюэнца)

Бұл да вирустық инфекция, алайда суық тиюмен салыстырғанда әлдеқайда ауыр өтеді, белгілері айқын және қауіпті асқынулардың даму қаупі жоғары. Тұмауды суық тиюден кенеттен басталуымен және белгілердің ауырлығымен ажыратуға болады, оларға:бүкіл дене бойынша бұлшықет ауыруы, қатты бас ауруы, айқын әлсіздік жатады. Әдетте жоғары дене қызуы мен жөтел болады. Ал мұрыннан су ағу тұмауда сирек кездеседі.

Синусит

Инфекцияның бұл түрі көбінесе суық тиюдің салдары ретінде дамиды. Суық тию кезінде вирустық инфекция мұрынның шырышты қабатын зақымдап, таныс суық тиюге әкеледі. Алайда инфекция тыныс жолдары арқылы мұрын қосалқы қуыстарына таралуы мүмкін. Егер осы мұрын қосалқы қуыстарында қабыну дамыса, бұл жағдай синусит деп аталады.

Синуситті суық тиюден келесі айрықша белгілер арқылы ажыратуға болады:

• бет аймағындағы қатты ауырсыну, оның сипаты мен қарқындылығы бас қалпына байланысты өзгеруі мүмкін;
• бас ауруы;
• мұрынның бітелуі және мұрыннан бөлінділердің бөлінуі, олар сұйық әрі шырыштыдан бастап қою немесе тіпті іріңді болуы мүмкін (бұл бактериялық қосымша инфекцияны көрсетуі ықтимал).

Егер менде синусит болса, не істеу керек?

Егер жоғарыда сипатталған белгілерге сүйене отырып, өзіңізде синусит бар екеніне сенімді болсаңыз, тиісті емді таңдау маңызды. Алғашқы кезеңде симптоматикалық ем ұсынылады: қабынуға қарсы дәрілер, деконгестанттар, муколитиктер, ауырсынуды басатын дәрілер. Егер бактериялық инфекцияға күдік болса, міндетті түрде дәрігерге қаралу қажет. Дәрігер антибиотиктерді тағайындау қажеттігін шешеді.